🌍♾⛵ الزواج وسيلة مش غاية 🌍♾⛵

By العالم الأكبر Last updated أكتوبر 11, 2022

🌲📣⚜🦄💸🏹🔱🪙🌻 الزواج وسيلة مش غاية :

بعد مرور سنتين على زواجي( شريف عمار )، أحب أشارككم بعض النصائح اللي كان ليها أثر كبير في وعلى زواجي واللي بعتبره الحمد لله زواجا ناجحا :

☘ الزواج وسيلة مش غاية، مش غاية إنك تتجوز لمجرد الجواز ويبقى اسمك اتجوزت، إنما وسيلة إنك تعيش مع الإنسان اللي بتحبه واختارته يعيش معاك بقيه حياتك ✔.

☘ الزواج مش أتنين أهلهم اتفقوا على شبكة ومهر وفرح وشقة، الزواج أتنين حبوا بعض، اتفقوا يقضوا حياتهم مع بعض، بأي شكل، في أي مكان، تحت أي ظروف ✔.

☘ الاستقلال المادي هو أحد أهم محددات حجم حريتك في اختيار شريك حياتك، لأنه في الأغلب اللي هيشتريلك سريرك هو اللي هيختار من هينام عليه جانبك ✔.

☘ للبنت: اختاري شريك الحياه الناضج فكريا ومستقل ماديا، طموح، مثقف، مسؤول٬ بيحترم أهله بس مش تابع ليهم، بياخد رأيهم كنصيحة مش أمر و فرض، بيحترم حياتك الشخصية واختياراتك في لبسك وشكلك وشغلك. بيخاف عليكي ويغير غيره صحيه مش غيره عمياء ملهاش مبرر. همه على دماغك مش على بطنه ✔.

☘ للولد: اختار شريكة الحياة اللي عندها استقلاليه “مادية” و أهم من كدا استقلالية “فكرية”، اللي تقدر تاخد قرارات من غير ما تهتم بالقيل والقال والعادات والمجتمع٬ اللي عمرها ما هتمضيك على ورقة “عبيطة” إسمها “القايمة”، ولا هتطلب منك فرح في أماكن بعينها، أو تحدد قيمة الشبكة علشان “تتفشخر” بيها قدام عيلتها وصاحبتها، اللي هتبقى عيزاك إنت لشخصك وبس تحت أي ظروف وفي أي مكان ✔.

☘ عمر ما كانت مغالاة الأهل في تكاليف ومطالب الزواج تقدير لبناتهم. المغالاه إن دلت فبتدل على إفتقار أصحاب الشأن (الولد والبنت) للألفة والمودة والمحبة والشخصية الكافيين إنهم يقفوا قدام العادات والأعراف اللي لسه كتير من أهلنا بيقدسها بحجة إنهم “بيعززوا بناتهم” و “بيأمنوا مستقبلهم”!! عمر ما كانت قيمة المهر أو ثمن الشبكة أو مكان الفرح مقياس لتعزيز البنت وتأمين مستقبلها. التعزيز الحقيقي للبنت هو تربيتها على تحمل المسؤولية٬ وبناء شخصية مستقلة ماديا وفكريا. والتأمين الحقيقي لمستقبلها بيكون بصنع “انسان” قوي، معيل لذاته٬ مبتكر، مؤثر٬ مستقل٬ ليه حرية الاختيار٬ وتقرير المصير٬ قادر على تحقيق أحلامه بنفسه ولنفسه. التعزيز الحقيقي لبنتكم هو ثقتكم فيها وفي اختياراتها من أصغر قطعة أكسيسوار لحد شريك حياتها. لأن اختيارتها وهي كبيرة بتعكس مدى تعبكم في تربيتها وهي صغيرة ✔.

☘ اللي بيحبوا بجد وفضلوا عمرهم مستنين “شريك حياتهم” وتعبوا لحد لما لاقوه٬ لازم يفكروا ألف مره علشان يسيبوه أو يستغنوا عنه أو حتى يزعلوه٬ هيفكروا ألف مره قبل ما عادات وتقاليد قائمه على الماديات ممكن توقف في طريق اختيارهم لبعض وإرادتهم إنهم يكملوا مع بعض ✔.

☘ كل ما يتقدم بيك العمر، كل ما هتحتاج وقت أطول ومجهود أكبر إنك تلاقي شريك حياتك المناسب، ودا نتيجة لخبرات اكتسبتها، ودروس اتعلمتها، ونماذج فاشلة كتير حوليك شوفتها، هتخلي للزواج قدسية وشعور بالمسؤولية اتجاه شريك حياتك وأولادك المستقبليين ✔.

☘ أنا بشجع على عمل الزوجة وتفوقها وتميزها في شغلها٬ وفي رأيي أن الزوج واجبه إنه يشجع شريكته على الشغل، لأن -على حسب مفهوم الشراكة- فنجاح وتميز وتفوق أي من الشريكين هو نجاح وتميز وتفوق للشريك الآخر. المرأة تقدر تشتغل أي شغل الرجل ممكن يشتغله٬ الرجل يتفوق عليها بس في الأعمال اليدوية اللي بتحتاج تحمل وقوة عضلية ✔.

☘ تحيزي لعمل الزوجة ميقللش أبدا من الزوجات اللي اختاروا “البيت”. اختيار الزوجه للبيت عمره ما كان عيب٬ العيب إن الزوج يدي لنفسه صلاحيات وحقوق سلطاوية مش من حقه لمجرد إنه هو “الكسيب”. سواء كان إختيارالست للبيت أو للشغل فالحالتين هي “مشاركة”. حافظوا على حقكم في المشاركة ✔.

☘ الزواج الخالي من الحب والعاطفة ما هو إلا مشروع عقاري٬ ينطبق عليه كل ما ينطبق على العلاقات العقارية من معاينة, ودفع رسوم، وتملك، وانتفاع ✔.

☘ الزواج الخالي من الحب والعاطفة تكون فيه المرأة للرجل مجرد جسد للمتعة والنسل، والرجل للمرأة مجرد بنك لسد احتياجاتها. علاقة عرضية مادية تنتهي بانتهاء المنفعة ✔.

☘ الرجل اللي بيعاني نقص في رجولته هيحاول دايما تعويض نقصه بالتسلط، والست اللي عندها نقص في أنوثتها هترضى بتسلطه وهتسميه “حب” ✔.

☘ المتجوز اللي بيكرهك في الجواز، اللي طول الوقت بيلعن في الجواز واللي عايز يتجوز مش معناه أبدا إن الجواز وحش، إنما معناه انه إنسان فاشل في جوازه أو متعقد من الجواز ✔.

☘ الزواج هو اعظم رابطة انسانية بتربط اتنين، ميثاق حب وثقة وصداقة أبدية، اهم شرط في نجاحه انك ماتستعجلش وتاخد وقتك في اختيارك. الوقت هو أهم ضمان في نجاح أي علاقة. الطلاق والجوزات الفاشلة الكثيرة اللي حوليك مش سببهم فشل “مفهوم الجواز”، إنما فشل المتجوزين في اختيار الوقت المناسب أو اختيار الشريك المناسب ✔.

☘ لا يوجد “سن” مثالي للزواج٬ بل هناك “وقت” مثالي للزواج٬ يأتي هذا الوقت عندما يأتي “الشخص المناسب”٬ فليس المهم “متى” نتزوج ٬ بل “من” نتزوج ✔.

☘ عندما تجدون الشخص المناسب تأكدوا بأنكم ستعيشون نعمة الزواج بشكله الحقيقي وصورته المذهلة. لا تعترفوا بمصطلحات “العنوسة” و “العزوبية”، ولا تصدقوا أن القطار يفوت، فذات القطار يعيد ذات الطريق آلاف المرات بركّاب مختلفين، فلا تجلسوا إلا بجانب الحبيب الذي يستحقكم ✔.

وفي النهاية أدعو الله أن يكفنا كل زواج روتيني ممل عمره قصير، نعيش فيه مع “غرباء”، مبني على عادات وموروثات كانت ولازالت السبب في فشل الكثير من العلاقات ✔. آمين .

***

لما قررنا نتجوز حطينا فلوسنا على بعض واتجوزنا

ولما قررنا نسافر أخدنا من فلوسنا اللي حطيناها على بعض وسافرنا

ولما سافرنا حطينا فلوسنا مع بعض في حساب واحد باسمنا احنا الاتنين

ولما احنا الاتنين اشتغلنا مرتباتنا راحت لنفس الحساب

مصاريف البيت، الإيجار، تعليم ليلى بنتنا، شوبينج، بنزين، صيانة عربيات الخ الخ الخ بندفعها أنا أو هي من نفس الحساب.

ووقت ما حد فينا بياخد أجازة من شغله (لما عملت Deferral لمنحة الدكتوراة، أو وقت حمل آمنة وفترة رعايتها ليلى مثلا)، مافيش حاجة بتتغير، وبنصرف من نفس الحساب.

آمنة بتحضر الأكل في أغلب الأوقات لأنها شاطرة فيه وبتحبه، أنا بشيل الأطباق وبغسلها

هي بتغسل، وأنا بنشر أو أرتب الأوض

هي بتأكل ليلى، وأنا بنيمها

أنا بوصل ليلى مدرستها الصبح، وهي بترجع تاخدها للبيت

ومافيش أي حاجة من الحاجات دي بتتعمل “by defualt”، إنما بتتعمل على حسب مين اللي بيعملها أفضل أو عنده وقت يقدر يعملها.

كم مرة قلت فلوسي وفلوسها !؟

كم مرة قلت أهلي أو أهلها !؟

كم مرة قلت الناس!؟

كم مرة قلت “عليها إيه” و”عليا إيه” سواء قبل الجواز أو بعده!؟

كم مرة قلت أنا ملزم بإيه علشان أنا الراجل، أو هي ملزمة بإيه علشان هي الست !؟

أنا وآمنة اتجوزنا علشان حبينا بعض، لأن الجواز هو “الوسيلة” اللي هتخلينا نعيش مع بعض. أحنا الاتنين عملنا كل اللي نقدر عليه علشان نقدر نتجوز، ورغم وجود عقبات مش سهلة بحكم اني مصري وهي تونسية، إلا إننا تخطيناها سوا، سفر وعادات ولغة و و و، كلها كان ليها حل وبسيطة قدام رغبتنا إننا نعيش مع بعض بقية حياتنا.

الهدف من المقال مش علشان تعمل زينا، ومش بالضرورة اللي بيعمل غير كدا جوازته بتفشل. أبويا وأمي مثلا معندهمش حساب مشترك، وبقالهم ٤٠ سنة متجوزين. وعلاقتهم ناجحة جدا.

الهدف من البوست علشان أقولك إن دي طريقة من طرق الشراكة في الجواز، وأقولك إن الجواز مش اتنين أهلهم قدروا يوصلوا لاتفاق على قايمة وشبكة ومهر وفرح وشقة، الجواز اتنين حبوا بعض، اتفقوا يقضوا حياتهم مع بعض، بأي شكل، في أي مكان، تحت أي ظروف.

الزواج هو اعظم رابطة انسانية بتربط اتنين، ميثاق حب وثقة وصداقة أبدية، مش حرب الراجل عليه ايه والست عليها إيه، والمنتصر هو اللي بيدفع أقل وبيخرج بأقل الخسائر.

خدوا وقتكم واختاروا صح علشان تقدروا تستمتعوا وتعيشوا نعمة الزواج بشكله الحقيقي وصورته المذهلة.

صورة مع أجمل هديتين من ربنا، زوجتي آمنة وبنتي ليلى. بقلم شريف عمّار

اقرأ أيضا ل” شريف عمّار ” هذاالمقال الرائع : كونُــك موجــودة لا يعنــي أنــكِ على قيــد الحيــاة

💎 شاهد هذاالخطاب الرائع ل “شريف عمار” :