🌍♾⛵ السقوط في الوعي والتحرر من الماتريكس 🌍♾⛵

0 853

🌲📣⚜🦄💸🏹🔱🪙🌻 السقوط في الوعي والتحرر من الماتريكس :

رحلة الوعي في الحياة أشبه بالتحرر المستمر من “الماتريكس”؛ التحرر المستمر من منظومة جوا منظومة جوا منظومة فكرية شعورية معقدة ومتشعبة متجسدة في شكل قوانين وأعراف وثقافات وحاجات لازم تعملها طول الوقت عشان تؤكد انتمائك للمنظومة في سبيل شعور مزيف بالأمان وبعض اللقيمات والجنيهات.

الماتريكس بتستنزف طاقتك الفكرية والجسدية والشعورية طول الوقت في مقابل كلام فاضي، وفي نفس الوقت بتعمل على اقناعك ان هو ده الطريق الوحيد للبقاء والنجاة.

الماتريكس بتغذي عقلك وتملا وقتك بهراء مالهوش لزمة في شكل صور مغرية أثناء جريك وراها بتنسى نفسك وتنفصل عن روحك وحقيقتك، بينما انت مقتنع ومؤمن إنك كده حقيقي وبشكل لا إرادي تلاقي نفسك بتدعو للوهم باسم الدين والعلم والواقع.

المفارقة كلها انك وانت بتحلم متعرفش انك بتحلم، متعرفش انت مين ولا جي هنا ليه ومش فاكر أي حاجة عن قدراتك الحقيقية؛ لأن الحقيقة بالنسبة لك وهم وهراء والوهم بالنسبة لك عين الحقيقة.

إدراكك إنك مضحوك عليك هي خطوة مهمة عشان تبدأ تفوق من الماتريكس. والطريق في بدايته مش سهل لأن المغريات كتيرة ومخيفة وملموسة ومقنعة أكتر بكتير من حقيقتك الـ انت نسيتها وبعدت عنها سنين ضوئية!

تتحرر من منظومة شغل مش بتحبه: مش هتلاقي فلوس!

تتحرر من منظومة جواز مش حاسه : مش هتلاقي حد أحسن … هتعنسي!

تتحرر من منظومة حد مسيطر عليك وبيتحكم في حياتك: مش هقدر أزعله .. مش هقدر أواجهه .. هيجراله حاجة بسببي!

تتحرر من منظومة دينية متخلفة: هتخش النار!

تتحرر من منظومة عادات وتقاليد فارغة: هيقولوا عليك ايه!

تتحرر من منظومة إدمان سوشيال ميديا … افتح بس بسرعة أكيد في رسالة مهمة جات لك!

دايما الماتريكس هتخوفك تتحرر منها وهتهددك

لأن طول مانت خايف طاقة حياتك في خدمتها

وهتفضل عبد ليها وتضحي بحياتك في سبيلها

مش مهم تكون بتكره الماتريكس أو بتحبها

مش مهم تكون بتلعنها أو بتمدحها

طول ما الخوف بيحركك فانت مش شايف

وطول مانت مش شايف .. الـ هتقولك عليه هتنفذه

عشان كده التحرر مش دايما سهل … وعشان كده في ناس بعد ما ترتقي في الوعي ويتصلوا بحقيقتهم ويتحرروا من أوهام كانوا مصدقينها، ممكن ترجع المغريات تسحبهم واحدة واحدة والمخاوف تضحك عليهم وهوب يلاقوا نفسهم “سقطوا” في الوعي. أعرف ناس كتير وتعاملت معاهم شافوا جانب من الحقيقة في حياتهم وحسوا بالاتصال مع روحهم وبدأوا يتحرروا ويختاروا حياتهم بالطريقة الـ هم فعلا عايزينها، وبعد فترة أتواصل معاهم ألاقيهم ناموا تاني .. كأنهم مش هم … كأنهم حد تاني بعد ما كان مشتعل بالحياة والشغف أصبح كائن زومبي رمادي تايه بيجري ورا رغبات وشهوات وأهداف مش بتاعته. في ناس بتكون دي فترة تحديات عادية وبيرجعوا يفوقوا منها لأن روحهم أصبحت متجذرة في الحقيقة، وفي ناس بتسقط فترات طويلة وممكن يكملوا حياتهم كزومبي والوعي بالنسبة لهم بقى ذكرى بعيدة من الماضي.

مهم تفهم إن الماتريكس مش شريرة ولا طيبة … ومفيش شخص واحد أو جهة بتتحكم فيها. الماتريكس هو نظام بيبدأ بفكرة، ولما عدد من الأشخاص بيؤمنوا بالفكرة دي ويروجولها وينفذوها ويشوفوا الواقع من خلالها، بعد شوية بتتحول لكيان موجود وقائم بذاته حتى لو الـ أنشأها نفسه مبقاش مؤمن بيها. ومع استمرار خضوع الناس للفكرة بتبدأ تكبر وتتشعب وتتحول لمنظومة شبه متكاملة من الأفكار والمعتقدات وبتتجسد كواقع مادي ملموس وحقيقي بالنسبة للخاضعين ليها.

التحرر من الماتريكس

التعامل مع الماتريكس بشكل سطحي وعنيف طول الوقت ان هي نظام شرير لازم تتخلص منه وتتحرر أخيرا وتوصل للنور هو في حد ذاته ماتريكس! زي ما قلنا قبل كده الماتريكس ميهمهاش انت مؤمن بيها ولا ضدها بتحبها أو بتكرهها، طول مانت بتتفاعل معاها بشكل غير واعي فهي مستفيدة من طاقتك. وحتى لو تحررت من منظومة فكرية معينة مبقتش مناسبة ليك، ممكن تلاقي نفسك بتتبنى منظومة فكرية تانية مناسبة ليك أكتر في المرحلة الحالية، وبعد فترة بقائك فيها هيكون عائق لتطورك في الوعي فتبدأ تسعى للتحرر من الماتريكس الحالية عشان تخلق واقع جديد وماتريكس جديدة. مش بحب أشوف الماتريكس دايما إنها حاجة وحشة، لكنها الطريقة والقوانين الـ الكون بيتبرمج بيها وبيتم صناعة الواقع من خلالها. فممكن واقع جميل فيه سعادة وحرية بالنسبة لك دلوقتي بعد فترة يصبح عائق، والعكس صحيح؛ لأن الحياة رحلة تطور وخلق ديناميكية ومستمرة.

عشان كده معنديش وصفة سحرية سهلة للتحرر من الماتريكس لأن تعريف الماتريكس بحد ذاته بيختلف من شخص لآخر وممكن يختلف عند نفس الشخص في مراحل مختلفة، لكن نقدر نقول إن الماتريكس هي النظام الـ بيخليك عايش في خوف ومنفصل عن روحك. وهنا شوية مقترحات تساعدك تخرج من الماتريكس:

*اتعلم تهدي دوشة عقلك وتتواصل مع روحك من خلال ممارسة التأمل لأن طول ما عقلك مزدحم ومشوش صعب تشوف أي حاجة بوضوح

*اعرف رسالتك في الحياة واسأل نفسك أنا موجود هنا ليه وبعمل ايه؟

*اتعلم يكون عندك انضباط في حياتك وتحافظ على عادات يومية توصلك لأي حاجة انت عايزها

*اهتم شوية بصحتك وقلل استخدام السوشيال ميديا بلا هدف لأن الغذاء الغير صحي والسوشيال ميديا هم من أكتر الحاجات الـ الماتريكس بتسيطر عليك من خلالهم

*تسائل باستمرار عن حقيقة الأفكار الـ انت مؤمن بيها ويا ترى هي حقيقية ولا لا وبتخدمك في حياتك ولا لا؟

*اتعلم تسمع صوت روحك وتكون إجاباتك من تجربتك المباشرة مش من كلام الناس ومخاوفهم

*انضم لمجتمعات واعية داعمة فيها ناس أحرار وحقيقيين بيسعوا انهم يعيشوا حقيقتهم ورسالتهم، وهو ده الهدف الـ عملنا عشانه “مدرسة ميسرة لايف للتأمل وفن الحياة

*اعرف إن الحياة دايما فيها خيارات كتيرة أوي واحتمالات وطرق لا نهائية توصلك لكل حاجة، لأن الماتريكس دايما هتحاول تقنعك إن مفيش غير خيار واحد أو اتنين. بقلم ميسرا صلاح

اقرأ أيضا ل ” ميسرا صلاح ” : 💖💖من فترة كتبت سؤال: ما هي الحرية؟💖💖

اقرأ أيضا : 💖💖 ماهو الدرس الوحيد الذي يريد الكون تعليمك اياه؟ 💖💖

اقرأ أيضا : 💖💖 كل معاناتك تكمن في الجهل 💖💖

اقرأ أيضا : 💖💖 جرب فقط تعيش للرفاهية الروحية 💖💖

اقرأ أيضا : 💖💖 السر الأعظم 1 و 2 و 3 💖💖

اقرأ أيضا : 💖💖 أتريدُ بؤساً أم نعمةً؟ 💖💖

اقرأ أيضا : 💖💖الكون يفتح أبوابه فقط للذين ينتبهون💖💖

DivaKhoolood369 DivaKhoolood888 🌳⛵🔥🌊💳💰💶💴💵💸🌹✨👑☯🌈👀👂🐝🚀☘💃💎💗💗🌏❄🌲🐎🐂🦅🐉🌞🌝🌻🌸🌺🍇🍓🥂🎼🛬🛸🛳🔑🔮⚖☯♈♉✅👑333.777.555.369👑🔱⚜💲📣♾8⃣8⃣🆒🆕🆓🆙

اترك رد

لن يتم نشر عنوان بريدك الإلكتروني.